LEGAZPI CITY-Tinapos na ni US President Donald Trump an pinakahalawig na government shutdown sa historya kan Amerika na naghaloy nin labi sa sarong bulan.
Makalihis ining mapirmahan ni Trump an funding bill sa saiyang Oval Office sa White House kan Martes.
Pinirmahan ini kan US President makalihis na maipasar kan House of Representatives an nasabing propwesto na igwang 222 – 209 na boto, kun sain 6 na Democrats kaiba an Republican lawmakers sa mga nagpabor.
Sa pagtapos kan shutdown an magbubukas giraray an gobierno kan Amerika asin mabalik na sa regular eskedyul an programming kan kongreso kan Estados Unidos.
Piglalaoman man na nagkapirang federal employees asin contractors an magbabalik sa trabaho ngonian na aldaw.
Magpapadagos man an pagpopondo sa federal agencies, mga departamento asin mga programa siring kan pinakadakulang anti-hunger program kan Estados Unidos na Supplemental Nutrition Assistance Program (SNAP), na nagtataong food aid sa 42 milyong mga namamanwaan.
Tatawanan man nin back pay an rinibong empleyado na dai nagkaigwa nin sahod poon kan magin epektibo an pagsasarado kan gobiernon kan Oktubre 1.
An mga paliparan man sa Amerika an magbabalik na sa normal na operasyon alagad pwedesir na maantala ini makalihis an regulasyon kan Federal Aviation Administration huli sa pag-menus sa flights sa 40 pinakadarakulang paliparan sa bilog na nacion kan Estados Unidos.
