LEGAZPI CITY-Nag-anunsyo an kalihim kan United States Defense na si Pete Hegseth na an pagsasagibo nin padusang bitay kay Nidal Hasan, dating psychiatrist kan US Army na guminadan nin 13 katawo sa base militar kan Fort Hood kan 2009, na ipapahiling sa publiko sa paagi nin livestream.
An pagbitay nakaiskedyul sa Disyembre 3, ala una nin hapon, Oras sa Sentral kan Estados Unidos, sa Fort Hood mismo saTexas.
Ini an eksaktong oras asin lugar kun saen mismo nangyari an pambabadil kan taon 2009.
Depensa ni Hegseth sa desisyon, dapat mahiling kan publiko an proseso nganing masabutasan an magabat na resulta kan siring na krimen.
Inaprobaran ni US President Donald Trump an paggamit nin firing squad tanganing gadanon si Hasan.
Kan 2013, nasestensiyahan si Hasan nin padusang kagadanan makalihis na mapatunayan na nagkasala nin 45 na kaso na konektado sa tuyong paggadan asin pagprobar na paggadan. Nambadil ini sa laog kan pasilidad kan militar mantang nagkukurahaw nin “Allahu akbar.’
Kun mautob, ini an pinakaenot na i-live-stream an pagbitay sa sarong sentensiyadong kriminal sa militar kan Estados Unidos. Kan 1945 an huring paggamit kan militar kan nasyon nin firing squad para sa padusang kagadanan.
