Tinawan duon ni Department of National Defense (DND) Secretary Gilberto “Gibo” Teodoro Jr. an importansya kan pagrespeto sa pangkinaban na ley asin an pagpapakusog kan kooperasyong panseguridad sa ginibong 13th ADMM-Plus sa Lapu-Lapu City, Cebu, kan Oktubre 29, 2026.
Sa saiyang talumpati sa hampang kan mga representante hali sa ASEAN asin an mga dialogue partners kaini, inihayag kan opisyal an tulong pangenot na prayoridad ngani na maibusol an katrangkiluhan, katatagan, asin seguridad sa rehiyon kan Indo-Pacific.
Kaibanan sa mga prayoridad na ini an mahigot na pagsunod sa United Nations Charter asin 1982 United Nations Convention on the Law of the Sea (UNCLOS), pagpapakusog kan maritime security cooperation, asin an pagprotehir sa mga migrant workers asin seafarers sa tahaw kan pangkinaban na krisis.
Tinawan duon ni Teodoro an krusyal na papel kan international community sa pagprotekta sa kapakanan kan mga Overseas Filipino Workers (OFWs) asinmga marino na igwang dakulang kontribusyon sa pangkinaban na ekonomiya, urog na sa panahon kan mga armadong labanan asin mga emergency sa manlain lain na nacion.
Ginibo an nasabing pagpupulong sa Cebu bilang parte kan padagos na pag-host kan Pilipinas sa mga serye nin halangkaw na antas kan pag-oolay kan ASEAN ngunyan na taon.
Nagserbing venue an provincia para sa pagtiripon kan mga defense ministers asin security leaders hali sa sampulong nacion kan rehiyon asin an saindang mga pangenot na dialogue partners siring kan Estados Unidos, China, asin Japan.
Obheto kan pag-oolay na ini na pakusugon an diplomasya asin tukaron an mga mainit na isyung geopolitikal siring kan seguridad sa West Philippine Sea asin an katrangkiluhan sa bilog na Indo-Pacific.
