LEGAZPI CITY-Preparado na an standby funds, family food packs, asin non-food items kan Department of Social Welfare and Development Bicol (DSWD) ngani mai-distribwir sa mga posibleng maapektaran kan “Bagyong Opong”.
Segun kay Department of Social Welfare and Development Bicol Regional Director Norman Laurio, sa intrevista kan Bombo Radyo Legazpi, na nakahanda na an saindang ahensya bago pa man maglaog sa PAR an bagyo asin nagkaigwa na man nin miting kaiba an ibang mga katakod na ahensya sa rehiyon.
Dagdag pa ni Laurio na 50% kan mga local government unit an nakapreparar na kan saindang mga family food packs ngani tulos na mai-distribwir sa mga posibleng apektadong pamilya.
Dugang pa niya na igwang P3-Milyon standby funds, nasa 206, 000 na family food packs asin non-food items na nakahanda sa mga regional asin provincial warehouses.
Afuera digdi an igwa man na nakahandang ready to eat na pagkakan para naman sa mga posibleng ma-stranded sa mga pantalan partikular na sa Matnog Port sa Sorsogon.
NaKa-alerto naman suboot an saindang mga personnel magin sa mga logistics siring kan mga trucks, command centers, asin mobile kitchens.
Nakikipag-koordinar naman sinda sa iba pang mga lokal na gobierno mapadapit sa mga stock file asin sa kahandaan kan mga provincial warehouses sa Albay.
Pangapudan kan opisyal sa mga namamanwaan na magdangog sa anunsyo kan gobierno asin magsunod enkaso magkaigwa nin evacuation huli sa papaabot na raot nin panahon.
