LEGAZPI CITY – Aksidente an inabot kan sarong kotse na buminaliktad makalihis na maglikay sa nagbabalagaw-bagaw na ayam sa Barangay Pange, Matnog, Sorsogon.
Segun ki Matnog Municipal Police Station Acting Chief of Police, Police Captain Wilfred Berdin sa intrevista kan Bombo Radyo Legazpi na kan magporbar na maglikay kan driver an dae kaini pighuna na silinyador palan an saiyang natikmakan na nagin rason nganing dae magpundo an saiyang behikulo.
Pwedesir man na nakadagdag pa sa aksidente an pagal kan driver huli ta hale pa ining Marawi asin nagba-byahe pa-Cavite sakay an saiyang pamilya kan buminaligtad an saindang pigsasakayang kotse.
Kan mag-abot suboot sinda sa pinagyarihan kan insidente an wara na an mga biktima asin nagdiretso na sana sinda sa hospital kun sain napag-araman nindang nagsapo sana an pitong sakay nin lugad sa saindang mga hawak asin nasa maray nang kamugtakan.
Pigtaram pa ni Hepe na pa-kurbada kaya asin madiklom an lugar na pinangyarihan kan insidente kun kaya pwedesir na nabigla ini sa naunambitang ayam.
Sa ibong kaini an dae man nakadamay nin ibang motorista asin bystander an aksidente huli ta bandang maagahon suboot nangyari an pagbaligtad.
Nagtarabangan man an mga residentes, Bureau of Fire Protection, Matnog Municipal Disaster Risk Reduction Management Office nganing marespondehan an mga biktima asin maigilid an kotse nganing dae man magkawsa nin pag-gabat kan trapiko sa lugar.
Pagirumdom ni Berdin sa mga pet-owners na igapos an saindang mga ataman na ayam nganing dae magkawsa nin peligro sa mga byhaero mantang dapat syertuhon man kan mga driver an saindang resistensya asin magpahingalo muna kun nakamate na nin pagal sa pagmamaneho.
