Dae ipighahale ni US President Donald Trump an pagpapadara kan saindang mga tropang suldado sa Ukraine nganing maipa-otob an anumang peace deal sa pagultangan kan Russia asin Ukraine.
Segun sa US President, tutukaron niya an nasabing orolay kabale an European leaders partikulamente na si United Kingdom Prime Minister Keir Starmer.
Pareho suboot na makikiparte an Europa asin US sa pag-secure para sa post-war peace sa Ukraine.
Pag-abot sa pagtatao nin security guarantees para sa Kyiv, sinabi ni Trump na kadakol na tabang an itatao pag-abot sa seguridad sa ano mang post-war settlement alagad ipigdoon niyang an Europa an first line of defense, katabang an reinforcement hale Amerika.
Sa sarong press briefing man sa luwas kan White House, kinumpirma ni Ukrainian President Volodomyr Zelensky na pig-suhestyon kaini na bumakal nin $90 billion na mga armas kan US, alagad nakatalaan pang isapormal an nasabing proposed deal bilang parte kan security guarantees na saindang natukar ni Trump kabale an EU leaders.
Tratrabahuhon suboot ninda an mga detalye katakod sa security guarantees sa laog kan 10 aldaw.
Mientrastanto, makalihis an pag-oolay sa pagultangan ninda Trump asin Zelensky kabale kan EU leaders, masunod na paplanuhon na man ni Trump an peace summit sa pagultangan ninda Zelensky asin Russian President Vladimir Putin, na susundan kan trilateral meeting kabale an US.
