LEGAZPI CITY-Nanindugan an Armed Forces of the Philippines (AFP) na bako inosenteng sibilyan an sarong University of the Philippines (UP) student leader na nagadan sa engkwentro sa Negros Occidental kan Abril 19, kun saen 19 an pinagtutubudang nagadan na miyembro kan New People’s Army (NPA).
Segun kay AFP Chief Gen. Romeo Brawner Jr., si Alyssa Alano, na sarong UP Diliman student council education and research councilor, nadukayan suboot na armado asin nakasulog nin combat gear sa tahaw kan bakbakan sa Toboso town sa pagultanan kan Philippine Army asin sa mga pinagtutubudang kasapi kan NPA.
Nag-poon an engkwentro sa Barangay Salamanca, kun saan susog sa pahayag kan militar, naghaloy nin pirang oras an sagupaan bago mag-atras an mga rebelde.
Narekober suboot kan mga militar an mga hawak, high-powered firearms, asin mga dokumentong pigladawan bilang ”subversive”.
Igwang limang pinagtutubudang rebelde an naarestar sa follow-up operations.
Afuera digdi, kinumpara man ni Brawner an kaso sa sarong insidente sa Occidental Mindoro, kun saen sarong Filipino-American activist an nasagip nin buhay makalihis suboot na maglaban sa mga militar, na kalaunan naibalik sa saiyang pamilya.
Liwat na nanindugan an AFP na nagsusunod sinda sa direchos humanos asin naggagamit sana nin puwersa enkaso kinakaipuhan sa tahaw kan mga armadong grupo.
