LEGAZPI CITY-Nakataas na an security alert kan U.S. Embassy sa Manila makalihis magadan an duwang Filipino-American sa engkwentro sa pagitan kan militar asin New People’s Army (NPA) sa Toboso, Negros Occidental kan Abril 19.
Huli digdi, pinayuhan kan embahada an mga namamanwaan kan Amerika na maglikay sa mga lugar na igwang aktibong operasyon kan militar, kabale an Negros, Leyte, Samar, asin Mindoro.
Pigkokonsidera kan Estados Unidos asin Philippine governments an NPA bilang foreign terrorist organization.
Nabanggit kan embahada na dapat magin maingat an mga Amerikano sa paglalakbay sa mga rural area asin tulos na maghale kun makahiling nin armadong mga grupo.
Kasabay kaini, nagluwas man sinda kan Demonstration Alert kasudma katakod kan Labor Day protests sa Metro Manila.
Kun sain pinayuhan man kan embahada an mga U.S. citizens na ibitaran an darakulang pagtiripon ngani maibitaran an posibleng kariribukan.
An nabanggit na alerto, parte kan mas pinahigot na seguridad kan U.S. Embassy sa nacion.
