LEGAZPI CITY-Asahan an mga kalat-kalat na pag-uran sa dakul na parte kan nacion huli sa epekto kan low pressure area (LPA) asin kan southwest monsoon o habagat, segun sa Philippine Atmospheric Geophysical and Astronomical Services Administration (PAGASA).
Basado sa 4:00 AM na weather forecast kan state weather bureau, huring nahiling an LPA sa distansyang 975 kilometros sa sirangan kan southeastern Luzon na igwang halangkaw na posibilidad na maging bagyo sa masunod na 24 oras.
An nasabing LPA makakaapektar sa Bicol Region, Eastern Visayas, Dinagat Islands asin Surigao del Norte.
Mientrastanto, sa Metro Manila, Mimaropa, Cavite, Laguna, Batangas, Zambales, Bataan, asin sa iba pang parte kan Visayas asin Mindanao, mamamatian man an kalat-kalat na pag-uran huli kan habagat.
Inaabisuhan an mga residentes sa Palawan, Catanduanes, Sorsogon, Northern Samar, Eastern Samar, Antique, Negros Oriental asin Negros Occidental na mag-ingat sa posibleng pagbaha asin landslide dara kan makusog na pag-uran.
Mantang an iba pang parte kan nacion makakamati nin paminsan-minsan na pag-uran o pagkikilat asin pagdaguldol.
