LEGAZPI CITY—Tiklo an sarong lalaki sa ikinundusir na buy-bust operation kan mga otoridad sa Barangay Cumadcad, Castilla, Sorsogon.
An suspek sarong 20-anyos, warang agom, residente kan nasabing barangay asin pigbisto na kaiba sa newly identified drug personality kan mga otoridad.
Naarestar an suspek sa tabang kan operatiba kan Castilla Municipal Police Station asin Municipal Police Drug Enforcement Unit (MPDEU) kun saen nagpabakal ini nin sarong pakete nin pigtutubudang shabu sa sarong police poseur buyer.
An nasambitang pakete may gabat na labi sa 0.4 gramo asin may street value na pocomas o menos P2,720.00, afuera digdi, nakumpiskar man saiya an P500.00 na ginamit bilang buy-bust money.
Sa presente nasa kustodiya na kan Castilla MPS an suspek magin an nakumpiskar na ebidensya para sa magkakanigong disposisyon asin posibleng mahampang sa kasong pagbalgar sa Republic Act 9165 o an Comprehensive Dangerous Drugs Act of 2002.
