LEGAZPI CITY-Naarestar an sarong pigtutubudang street-level individual na midbid sa alyas na “Ron” sa buy-bust operation na ginibo kan joint law enforcement personnel sa Guinobatan, Albay.
An operasyon pinangenotan kan Municipal Drug Enforcement Unit kan Guinobatan MPS, kaiba an mga personahes hale sa 1st Albay Provincial Mobile Force Company asin PDEA Team Albay, sa koordinasyon kan PDEA Regional Office 5.
Inarestar an suspechado makalihis na matrayumpong makabakal an poseur-buyer nin sarong heat-sealed sachet na may laog na substance na pigtutubudang shabu, na may gabat na poco mas o menos 0.07 grams asin nagkakantidad nin P476.
Sa kasunod na pagsearch kan mga otoridad, narekober an dugang na anom pang heat-sealed sachets na may laog nin pigtutubudang shabu.
An mga ini igwa nin pigkakarkulo na pinagsararong gabat na 5.3 gramo asin igwang kantidad na P36,040.
Sa kabilogan, nakumpiskar kan mga awtoridad an poco mas o menos 5.37 grams nin pigtutubudang shabu na may pigkakarkulong standard drug price na p36,516. Narekober man an sarong P500 bill na na ginamit bilang buy-bust money asin sarong black pouch.
Ginibo an pagrekisa asin pagkumpiskar sa presensya kan suspechado asin kan mga mandatoryong testigo, mantang an operasyon pigdokumento gamit an Alternative Recording Devices bilang pagsunod sa eksistidong guidelines.
Dinara na kaiba kan mga narekober na evidencia an suspechado sa Guinobatan MPS para sa magkakanigong disposisyon.
