suspension of in-person classes
suspension of in-person classes

LEGAZPI CITY – Nagpatupad na nin pagbabago sa oras nin klase an nagkapirang eskwelahan sa Albay bilang lakdang tanganing protehiran an mga estudyante asin paratukdo kontra sa epekto kan halangkaw na heat index.

Segun ki Schools Division Office (SDO) Albay spokesperson Froilan Tena, sa intrevista kan Bombo Radio Legazpi, kabale sa mga eskwelahan na nag-adjust nin class hours an mga nasa banwaan kan Malinao, Guinobatan asin Oas.

Sa irarom kan naunambitang lakdang, pwedesir pahaliputon an oras nin face-to-face classes, kun saen an sarong eskwelahan sa Malinao an nakatalaang magtapos an klase nin alas-10:45 nin aga tangani maibitaran an matinding init sa peak hours.

Ipigpaliwanag ni Tena na basado an pagpapatupad kan adjusted class hours sa koordinasyon kan mga school head asin local chief executives alinsunod sa umiiral na mga regulasyon kan gobyerno.

Pigsierto man niyang nagpepreparar an mga paratukdo nin learning activity sheets asin iba pang alternatibong paagi tanganing dae maputol an pagkatuto kan mga estudyante.

Pighihikayat man niya an mga magurang na siertuhong bastante sa tubig asin marhay na napangangalagaan an saindang mga aki tanganing maibitaran an heat-related illnesses.