LEGAZPI CITY—Nag-abot na sa 22 fishpond operators na gikan sa Barangay Guruyan, Buraburan, Puting Sapa sa banwaan kan Juban, Sorsogon an apektado kan pagputok kan Bulkang Bulusan.
Segun ki Bureau of Fisheries and Aquatic Resources (BFAR) Bicol Spokesperson Rowena Briones, sa intrevista kan Bombo Radyo Legazpi, susog sa inisyal na datos, an nasambitang 22 fishpond operators an igwa nin total area na 5,500 square meters na kun saen an estimated volume na kantidad nin danyos an maabot sa 3,966 kilos na tilapia.
Dugang pa kaini na preparado man an saindang ahensya sa pagtao nin asistensya sa mga operators—kun saen sinabi ni Briones, na igwa sindang buffer stocks nin fingerlings para sa tilapia.
Padagos man an monitoring kan ahensya urog na sa water quality na posibleng maapektaran huli kan ashfall.
Sa presente, padagos an koordinasyon kan BFAR sa manlaen-laeng ahensya ngani ma-assess an sitwasyon magin an nagin destroso sa nasambitang kabuhayan kan mga parasisira.
Mientrastanto, pagiromdom man kan opisyal sa mga parasisira na makipagkoordinar sa Municipal Agriculture Office o sa BFAR Sorsogon en kaso naapektaran o may mairehistrong danyos sa saindang fishpond o fish cages.
