Nangangapodan an 73% kan mga Pilipino na humampang si Vice President Sara Duterte sa Senate impeachment trial nganing simbagon an mga alegasyon laban saiya, kabale an suboot pagbabanta kina Presidente Ferdinand Marcos Jr., First Lady Liza Araneta-Marcos, asin Speaker Martin Romualdez.
Isinagibo an survey poon Pebrero 10 hasta 12, na may 2,400 respondents gamit an mobile-based platform.
Nagluwas man sa survey na 51% an nagsusuporta sa impeachment case, 22% an undecided, asin 27% an tutol.
Pinakamakusog an suporta hale sa Luzon, partikular sa Metro Manila, Southern Luzon, Central Luzon, asin Northern Luzon, mantang pinakamakusog an pagtutol sa Mindanao, na bisto na balwarte kan mga Duterte.
Afuera sa assassination plot, kaiba man sa mga alegasyon an iregularidad sa paggamit kan confidential fund kan Office of the Vice President asin Department of Education (DepEd).
Nasa 51% kan mga respondents an pabor na imbestigaran an suboot an dae pagkakatugma sa yaman ni Duterte asin sa saiyang Statement of Assets, Liabilities, and Net Worth (SALN), mantang 33% an tutol digdi.
Apat hasta lima sa kada 10 rehistradong botante an nagsabing iboto ninda an mga senatorial candidate na nagsusuporta sa impeachment laban kay Duterte, mantang 25% an nagsabing dae ninda iboboto an pro-impeachment candidates.
