LEGAZPI CITY – Karsel an bagsak kan sarong 40-anyos na lalaki makalihis madakop sa isinagibong buy-bust operation sa Barangay Anislag, Daraga, Albay.
Segun ki Daraga Municipal Police Station Chief of Police Police Lieutenant Colonel Edgar Azotea sa intrevista kan Bombo Radyo Legazpi na binisto an suspetsado na warang agom, sarong cook, residente kan Barangay Bitano, Legazpi City asin pigkokonsiderar na High-Value Individual kun sain nakuwa saiya an 29 pakete kan pigtutubudang shabu.
May kabilugan suboot na gabat an kontrabando nin maabot sa 125 grams na may standard drug price na nagpapakol sa P856,800.
Nagpasalamat man siya sa Philippine Drug Enforcement Agency Albay Provincial Office, Philippine Drug Enforcement Agency Regional Office V, sa media, asin sa konseho kan nasabing barangay huli sa magayon na koordinasyon nganing madakop an suspetsado.
Pigtaram pa kan opisyal na kun enkaso dae ninda ini nasakote an pwedesir na nakapang-biktima na ini nin mga jovenes sa banwaan na ikaka-raot kan saindang buhay.
Napag-araman man ninda na luwas-laog na an suspetsado sa kulungan huli ta bako sana mapadapit sa droga an saiyang pigkaka-imbweltuhan kundi dati nang nahampang sa manlain-laing kaso.
Sa matrayumpo man na operasyon an piglalaoman nindang malipat an mga pag-iriba kan suspetsado nin lugar na pagbabagsakan kan mga ilegal na kontrabando kun kaya nakikipagkoordinar na man sinda sa mga kataraid na ciudad asin banwaan nganing mapatanidad sinda.
Pangapodan ni Azotea sa mga naggagaramit asin nagpapabakal nin mga droga na dakol an paagi nganing maghanap-buhay kun kaya maghanap na sana nin maray na trabaho asin dae na mangraot nin buhay nin iba.
