LEGAZPI CITY-Uminabot na sa 32 an mga nagadan makalihis na magsiklab an mga pag-atake sa pagultanan kan Thailand asin Cambodia.
Segun sa defense ministry kan Cambodia, kairiba sa mga nagadan an limang militar asin walong sibilyan.
Nagpoon an pagatake kan Huwebes kung sain nagkaigwa nin magkakasunod na pagsabog sa border kan duwang nacion, huli sa palitan kan pag-atake kan saindang mga militar.
Sa sarong video, mahihiling na nagdudulagan asin nagtatago an nagkapirang mga residente.
Sa saro pang video na ipinaluwas kan mga militar kan Thailand, mahihiling an paghulog ninda nin bomba sa sarong depot kan Cambodia hale sa saindang drone.
Nasulo man an sarong convenience store sa may gasolinahan sa Sisaket province sa Thailand huli sa pag-atake kan Cambodia.
Sa Surin province sa Thailand, wara na nin mga tao, mga sasakyan, asin sararado na an mga tindahan.
Mientrastanto, dara man kan nagkapirang residente kan Cambodia an saindang mga gamit ngani makaebakwar.
Ipighayag kan Thailand na nagpoon an tensyon makalihis na magin irido an saindang mga militar huli sa mga landmine sa border na inilaag suboot kan Cambodia, na pignegaran man kaini asin nagsabing an Thailand an nagpoon kan mga pag-atake.
Basado sa impormasyon, dekada na an nakalihis kan magiwal an Thailand asin Cambodia sa hangganan kan saindang teritoryo kung sain yaon an sarong templo na itinao sa Cambodia kan International Court of Justice.
Nagsiklab an tensyon kan probaran kan Cambodia na irehistro ini bilang sarong UNESCO World Heritage Site.
Nagpatanid man an Philippine Embassy sa Thailand sa mga Pilipinong harani sa border na mag-ingat.
Naenot nang pigsasabi kan Philippine Embassy sa Cambodia na ibitaran an mga lugar kung sain may tensyon.
Sinabi man kan Department of Foreign Affairs (DFA) na igwang labi 7,000 Pilipino an nasa Cambodia mantang nasa 33,000 Pilipino an nasa Thailand
