LEGAZPI CITY-Kinumpirma kan Department of Foreign Affairs (DFA) na 78 Pilipino na nagin biktima kan human trafficking sa Myanmar an pinalaya hale sa mga tinaguriang scam centers.
An mga ini dati nang nakulong huli sa mga kasong may kinaaraman sa immigration, kaiba an illegal entry asin residency.
Segun sa DFA, an Philippine Embassy sa Yangon, presenteng nakikipag-koordinar sa mga otoridad kan Myanmar ngani masierto an marikas, ligtas, asin maayos na repatriation kan mga Pilipino pabalik sa nacion.
Nagpasalamat man an DFA sa gobierno kan Myanmar sa saindang isinagibong lakdang.
Nabanggit kan ahensya na ini an patunay kan maayos na konkesyon sa pagultanan kan Pilipinas asin Myanmar.
Marurumduman na kan taong 2025, nakapagrepatriate an Department of Migrant Workers (DMW) nin 839 Pilipino haleng Myanmar, kun sain 690 sa sainda an natawan nin tabang-pangkabuhayan.
Padagos man na pinagbabantayan kan DMW an mga online postings na nag-aalok nin pekeng package tours asin trabaho sa iba pang nacion, arog kan Thailand, Cambodia, Laos, asin sa Myanmar.
Labi pa 200 Pilipino na nasa Myanmar an presenteng naghahagad nin tabang para sa repatriation, mantang nasa 17,000 posts man an may konkesyon sa illegal recruitment asin pekeng job offers an na-take down sa Internet.
