Tinuyaw kan Department of Foreign Affairs (DFA) an mga pahayag kan Chinese Embassy sa Maynila sa social media, na inapod kaining “escalatory and undiplomatic” o nagpapalala nin tensyon asin dae naaayon sa diplomatikong asal.
Segun sa DFA, nakakaraot nin tiwala kan duwang nacion an nasabing mga pahayag asin nakahahadlang sa pagsisikap na pakusogon asin pamarayon an relasyon kan Pilipinas asin China.
Tinawan-doon man kan ahensya na piglalaomang mahiro asin mapahayag an mga diplomat sa paaging angkop sa saindang mandato, urog na sa paggamit nin social media.
Aktibo kaining mga nakalihis na aldaw an social media account kan Chinese Embassy sa Maynila sa pagsimbag sa mga pahayag kan mga opisyal kan Pilipinas katakod kan kontrobersiyal na pahayag ni Chinese Ambassador Jing Quan kan Oktubre 15.
Nagpuon an batikos kay Jing matapos niyang sabihon na madaling madadaog kan China an Pilipinas kung gagamit ini nin pwersa, mantang nilinaw man niyang bako ini an mawot kan Beijing asin obheto kaining mamantinir an katoninongan.
Dinepensaran man kan Chinese Embassy ang ambassador asin sinabing hinali sa konteksto an saiyang mga pahayag.
Sa ibong kan pagmamantinior kan DFA sa pagtaong importansya kaini sa relasyon kan Pilipinas asin China, pigdoon kaining dae naaayon sa haloy nang diwa kan konstruktibong pakikipag-ugnayan ang mga pahayag kan embahada.
Nagpatanid man an DFA na nakalaan sa gobierno an direchos na magsagibo nin kadugangang lakdang diplomatiko kung kinakaipuhan.
