LEGAZPI CITY-Uminabot sa tulong katawo an nagadan makalihis an pinagtutubudang Hantavirus outbreak sa sarong cruise ship sa Atlantic Ocean, susog sa World Health Organization (WHO).
Kinumpirma kan organisasyon na sarong kaso pa sana an kumpirmadong gadan, mantang lima pa an padagos na pigbeberipika.
Napag-araman man na sarong 69-anyos British national an presenteng nasa intensive care sa Johannesburg, sa South Africa.
An hantavirus, iyo an kadaklan na naipapasa sa tawo hale sa mga kino sa paagi kan saindang ihi o dumi, na pwedisir na magresulta sa malalang helang sa paghangos.
Sa bibihirang pagkakataon, pwedisir ining mapasa sa paagi kan “Human-to-human transmission”.
Mientras tanto, naireport man an nasabing outbreak sakay kan MV Hondius, na pigpapadalagan kan Oceanwide Expeditions, asin nagba-biyahe poon Argentina pasiring sa Cape Verde.
Segun sa mga otoridad sa South Africa, an enot na pasyente, nagpahiling nin sintomas sa sarong 70-anyos na lalaki na nagadan mantang nasa barko ini.
Susog sa World Health Organization, padagos an saindang koordinasyon sa mga nacion para sa medical evacuation kan mga pasyenteng nasa barko, siring man an pagsasagibo nin public health risk assessment asin pagtatao nin suporta sa mga luand kan barko.
