LEGAZPI CITY — Pig-aaram pa hasta sa presente an pinag-ugatan kan nagbungkaras na kasulo sa Purok 2, Brgy 2 EM’s Barrio sa ciudad kan Legazpi.
Totally damaged sa nasabing insidente an mga harong na pagsadiri kan pamilya Borromeo, Nodo, Triumfante asin 90% damaged man an harong kan pamilya Ojano mantang pig-aaram pa kun siisay an kagsadiri kan tulo pang harong na partially damaged.
Sa intrevista kan Bombo Radyo Legazpi ki BFP Legazpi Deputy City Fire Marshall SFO4 Jesus Reyes, gibo sa light materials an kadaklan sa mga harong mantang nagkapira man an semi-concrete kaya pigkakarkulong nasa P154,000 an danyos sa kasulo susog sa inisyal na imbestigasyon kan arson investigator.
Ipinagpapasalamat man kan opisyal na wara nang iba pang nadamay sa insidente dawa pa haros magkakadukot an mga harong sa lugar, huli naman sa marikas na responde kan mga otoridad.
Napag-araman na nag-abot pa sa third alarm an kasulo sa city level mantang tulo man an nagsapar nin minor injuries na na binistong sinda Rey Nudo, 44-anyos, Amy Candelaria, 53-anyos asin sarong Mr. Chua kan Filipino-Chinese Fire Volunteers.
Marikas man na tinawanan nin medikal na tratamento an mga ini sa pagresponde kan ambulansya kan BFP.
