LEGAZPI CITY—Nagresulta sa pagkakaarestar kan 29 indibidwal an isinagibong pagsakyada kan mga otoridad sa sarong pigtutubudang jueteng hub sa Barangay Sipi, Daraga, Albay.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, na huli kan saindang cyberpatrolling kun sain nahiling an sarong nagla-live nin operasyon kan jueteng an digdi na ninda ini sinundan antes na ipigsagibo ini sa nasabing lugar.
Nagkundusir nin surveillance an kapulisan nin haros tulong aldaw sa lugar sagkod na mahiling na ninda kun sain ini nag-ooperate.
Tulos na sinakyada kan mga otoridad an pigtutubudang jueteng hub kun sain naabutan an nasa 29 persona na nag-ooperate asin na-profile sa lugar.
Dugang ni Nuñez na kadaklan sa mga naarestar an gikan sa provincia kan Quezon, mantang an iba an residente kan nasambitang banwaan.
Segun sa opisyal na nakumpiskar sa lugar an manlaen-laeng ebidensya siring kan mga booklet, Collection Report Forms, electric tambiolo magin an P240,000 na kwarta.
Isinagibo an operasyon kan pinagsarong pwersa kan Daraga Municipal Police, Albay PPO, Regional Mobile Force Company 5, Criminal Investigation and Detection Group (CIDG) Albay Provincial Field Unit, asin Regional Intelligence Division 5.
Mientrastanto, mahahampang an mga naarestar na indibidwal sa kasing pagbayolar sa Presidential Decree No. 1602, na inamyendaran kan Republic Act No. 9287 o Illegal Numbers Game Law.
