LEGAZPI CITY – Gadan an 13-anyos na joven makalihis na malamos sa Zone 4 Barangay San Agustin, Libon, Albay.
Segun ki Libon Municipal Police Station Spokesperson Police Executive Master Sergeant Francisco Matociños sa intrevista kan Bombo Radyo Legazpi na nakaresibi sinda nin impormasyon sa paagi kan phone call hale sa nasabing barangay manungod sa sarong menor de edad na nagkakarigus an nawawara asin bado na sana an nahiling sa salog .
Makalihis an sarong aldaw an naglataw an hawak kan biktima na wara nang buhay asin nahiling ni Severino Segubiense sa Zone 6 kan kaparehong barangay.
Base man sa saindang pakikipag-olay sa kapamilya kan biktima an napag-araman na dae nagtakas man sana an biktima asin dae nagtaram saiyang lola asin tito na makarigus palan ini sa salog.
Pigtaram pa kan opisyal na dae man tatao maglangoy an biktima kun kaya dae ini nakaporbar kan pigdara ini kan agos sa hirarom na parte kan salog na resulta man kan pagkalamos kaini.
Pwedesir suboot na naisipan kan biktima na magkarigus sa nasabing salog huli sa labing init kan panahon sa naeeksperyensya sa banwaan nin Libon, Albay.
Naglataw na an hawak kan biktima huli ta haros dose oras na ining nakalubog sa irarom kan tubig mantang ini suboot an enot na bes na may nalamos sa Barangay San Agustin.
Pagirumdom ni Matociños sa mga magurang na bantayan an saindang mga aki asin dae pagpabayaan kun nagkakarigos sa mga salog asin dagat nganing makalikay an ano man na dae piglalaomang insidente.
