LEGAZPI CITY- Ipig-oorgolyo ngunyan kan Philippine Drug Enforcement Agency (PDEA) Sorsogon an pagkakadeklarar na drug cleared kan 100% na mga barangay sa probinsya kan Sorsogon.
Ini makalihis makasunod sa gabos na parametro kan Regional Oversight Committee para sa Barangay Drug Clearing Program, na pinangengenotan kang ahensya katabang an Philippine National Police (PNP), Department of the Interior and Local Government (DILG), asin Department of Health (DOH).
Sa intrevista kan Bombo Radyo Legazpi ki Agent Adrian Fajardo, Provincial Officer kan Philippine Drug Enforcement Agency (PDEA) Sorsogon, sinabi kaini na sa 441 na mga barangay sa probinsya, 334 digdi an deklarado ng drug cleared mantang 207 kaini an drug free o dae nanggad nakapagrehistro nin anuman na kaso nin iligal na droga.
Sa ngunyan, apat na munisipyo pa an dae natatawanan nin certipikasyon sa drug clearing.
Kaiba digdi an banwaan kan Gubat, Irosin, Castilla asin Donsol.
Segun sa opisyal, saro sa mga nagiging agyat kan mga lokal na gobyerno an pagkakaigwa nin balay silangan na mangangataman sa reformation kan mga PWUDs o persons who used drugs.
En kasong magin magayon an dalagan kan deliberasyon sa maabot na bulan, piglalaoman na makakapagsumite na nin aplikasyon an probinsya tanganing maideklarar ng kaenot-enoting drug cleared province sa Bicol.
Sa ibong kaini, padagos an pangapudan kan opisyal sa publiko na makipagkooperar sa mga law enforcement unit na tanganing masugpo an problema sa iligal na droga sa lugar.
