LEGAZPI CITY—Arestado kan mga otoridad an sarong wanted person kan Tabaco City sa Dela Cruz St., Luma Degato, Marilao, Bulacan.
Segun ki Tabaco City Police Station Public Information Officer Police Staff Sergeant Elaine Adriano, sa intrevista kan Bombo Radyo Legazpi, binisto an suspek na sarong 35-anyos, construction worker, asin residente kan Purok 4, Barangay Rawis, San Miguel Island, Tabaco City.
Naarestar an suspek huli sa ipinaluwas na mandamiento de aresto para sa kasong 2 counts nin Acts of Lasciviousness na may kinaaraman sa Republic Act 7610 o Special Protection of Children Against Abuse, Exploitation and Discrimination Act na may P180,000 pigrekomendang piyansa kada sarong kaso; Lascivious Conduct na may piyansang P200,000; asin sarong kaso pa nin Acts of Lasciviousness na may piyansang P180,000; asin saro pang kaso nin Lascivious Conduct na may piyansang P200,000.
Sa presente nasa kustodiya kan Tabaco CPS an suspek para sa magkakanigong disposisyon.
Mientrastanto, dugang kan opisyal na padagos na nagkukundusir nin mga operasyon an saindang opisina asin pangapudan man ni Adriano sa publiko na makipagkoordinar sainda nganing mapuho na an mga krimen sa komunidad.
