LEGAZPI CITY- Target kan Virac Municipal Police Station na maideklara ng drug cleared an banwaan sa 1st quarter kan taong 2025.
Sa intrevista kan Bombo Radyo Legazpi kay PMAJ Emsol Icawat, hepe kan Virac Municipal Police Station, sa ngunyan duwa pang barangay an nagsasairarom sa proseso asin balidasyon kan saindang mga dokumento, ini an Barangay Conception asin Palnab Del Norte.
Segun ki Icawat, dakulang agyat sa mga otoridad an deliberasyon huli ta an banwaan na sana an natatadang munisipyo na dae pa naidedeklarang drug cleared sa probinsya kan Catanduanes.
En kasong magpadagos an magayon na dalagan kan kampanya kontra iligal na droga, maidedeklara na ining drug cleared municipality.
Kun magigirumduman, kan nakalihis na Agosto 23 kan ideklara namang drug -cleared ang barangay kan Sta. Elena asin San Isidro Village.
Ini makalihis an isinagibong balidasyon sa mga dokumento na isinumite sa Regional Oversight Committee for Barangay Drug Clearing Program.
Mientrastanto sa ngunyan, padagos an paglaban kan mga otoridad kontra sa iligal na droga kasabay kan pangapudan sa publiko na makipagtabangan nganing dagos ng mapuho an haloy ng problema sa banwaan.
