LEGAZPI CITY – Nagsagibo na nin tree pruning an mga otoridad sa Barangay Washington Drive, Legazpi City bilang preparasyon sa posibleng epekto ni Bagyong Uwan na sa ngonian an nasa typhoon category na.
Segun ki Legazpi City Public Safety Office Head Octavio Rivero sa intrevista kan Bombo Radyo Legazpi na aga pa sana an nagpoon na an nasabing operasyon na pigtarabang tabangan kan manlain-laing ahensya kan gobierno.
Kun dae suboot puputulon an mga nasabing kahoy an pwedesir ining magdara nin peligro sa mga motorista enkaso mamatean na an epekto ni Bagyong Uwan.
Paramientras man nindang pigsarado an parte kan kakalsadahan para sa mga motorista nganing magtaong dalan sa tree pruning asin paglilinig kan mga pinutol na kahoy.
Pigtaram pa kan PSO Chief na enkaso magkaigwa liwat nin kaparehong operasyon an lokal na gobierno an tulos nindang sasaraduhan an tinampong nasasakupan kan mga kahoy.
May mga idedeploy man sindang mga personahes nganing tumabang sa publiko sa pagsasagibo nin evacuation.
Pighagad man ni Rivero sa publiko an pagsabot huli ta piggigibo ninda an mga siring kaining lakdang nganing mamantenir an kaligtasan kan publiko.
Pangapodan niya man na permihang mag-ingat asin magin rigmat partikulamente na an mga nasa high risk areas kan ciudad asin dae na paghalaton na magsagibo pa an mga otoridad nin force evacuation.
