LEGAZPI CITY – Pigsyerto kan Legazpi City Public Safety Office na nakabantay sinda sa manlain-laing lugar katakod kan pagselebrar kan Linggo nin Pagkabuhay.
Segun ki Legazpi City Public Safety Office Chief Octavio Rivero sa intrevista kan Bombo Radyo Legazpi na may personahes sindang nakabantay sa mga simbahan asin dagat sa may parte kan Barangay Puro asin Lamba na kalimitang pigruruso kan publiko.
Pagdoon niya na amay na sindang nagdeploy kan saindang mga personahes nganing tulos na makataong asistensya enkaso may dae pinaglalaoman na mangyari ngonian na aldaw.
Pig-abisuhan niya man an pirang makararigus na ipagbugtak suboot an alak sa tulak asin bako sa utak nganing magin salbado an mga ini sa anumang klase nin peligro urog na an pagkalamos.
Pigheras man kan opisyal na nakasulot sana nin shorts an saindang mga personahes na nakadeploy sa mga dagat nganing komportable asin marikas kaining maagapan an mga nalalamos.
Mientrastanto, nagin matuninong man an saindang assessment sa mga isinagibong prusisyon kan Biyernes Santo sa enterong ciudad huli sa amay nindang paglalatag kan plano kabale na an traffic re-routing.
Pangapodan man ni Rivero sa mga makararigus sa dagat na mag-ingat asin nakabantay sinda magdamlag kabale an manlain-laing ahensya kan gobierno nganing syertuhon na salbado an pagselebrar kan Easter Sunday.
