Nilinaw ni Transportation Secretary Jaime Bautista na bakong hali sa CCTV camera kan Manila International Airport Authority an nag-viral na picture ni Bise Presidente Sara Duterte mantang nasa airport nganing magbiyahe pasiring sa Germany.
Naging viral an nasabing picture asin ikinadismaya kan kadakol na mga Pilipino huli ta natapat ini sa aldaw kung nuarin pigbabaha an dakol na lugar sa Pilipinas huli sa Habagat asin Bagyong Carina.
Segun kay Bautista, wara nin CCTV sa lugar kung kaya imposibleng hali sa erepuerto an picture.
Posible suboot na saro sa mga pasahero an nakabisto sa bise presidente asin nagkua kan picture.
Ginibo ni Bautista an pahayag, kasunod naman kan mga patutsyada ni Duterte sa suboot maluyang seguridad sa mga erepuerto kan nasyun asin kawaran nin respeto sa privacy lalo na sa aki niyang menor de edad.
Magigirumduman na enot naman na sinabi kan Office of the Vice President na natapat sana sa panahon nin bagyo an biyahe na igwa man nin travel authority hali sa Office of the President.
