LEGAZPI CITY- Ipinaliwanag kan Albay Public Safety and Emergency Management Office (APSEMO) na an Tail End of a Cold Front (TECF) an saro sa mga mayor na rason kun nata dakol an nairehistrong casualty sa provincia durante kan Bagyong Usman, kan nakaaging Disyembre 2018.
Sa pahayag ni APSEMO chief Dr. Cedric Daep sa session sa Junta Provincial kan Albay, diit man sanang pag-uran an dinara kan Tropical Depression Usman sa provincia alagad pinalala suboot kan weather disturbance na causa kan TECF.
Segun ki Daep, pinalumoy kan mga pag-uran an daga na nagresulta sa mga landslide partikular na sa banwaan kan Tiwi, kun sain nasa 21 katawo an nairehistrong casualty.
Alagad tinawang duon kan opisyal na dae man nagkulang sa pagtatao nin abiso sa publiko na mag-evacuar asin ibitaran an paglawod huli sa raot kan panahon.
Padificilan kaya suboot an pagpapa-evacuar urog nang nataon man ini sa pagsabat kan Bagong Taon.
Mientras tanto, ipigsuhestiyon kan opisyal an pagkakaag nin mga makabagong parametro na ma-monitor sa rainfall level asin pagsasairarom sa training sa disaster response kan mga bagong barangay officials.
