LEGAZPI CITY-Nasabat an sarong forward truck sa Tabaco City Port sa banwaan kan Albay huli ta kargado ini nin iligal na produktong petrolyo asin warang permit.
Segun kay Coast Guard District Bicol Spokesperson Lieutenant Junior Grade Alyzza Novie Bermal, sa intrevista kan Bombo Radyo Legazpi, na nasabat ini mantang nagsasairarom nin inspeksiyon an Coast Guard Substation Tabaco, kairiba an Coast Guard K9 asin iba pang unit kan Coast Guard District Bicol.
Dagdag pa niya na gikan an truck sa Tabaco City pasiring sa San Andres, Catanduanes.
Durante kan beripikasyon, hinapot an pahenante kaini asin sinabing semento an laog kan truck alagad nadiskubre digdi an pigkakarkulong nasa 5,400 liters kan iligal na produktong petrolyo.
Wara pang kumpirmadong kantidad an mga kargamento asin padagos pa an imbestigasyon kan ahensya mapadapit digdi.
Sa presente, dinara an driver asin helper kan truck sa Coast Guard Subtation Tabaco para sa kaukulang dokumentasyon asin legal na proseso.
Mientras tanto, temporamenteng nasa irarom kan kustodiya kan Philippine Ports Authority an truck asin kargamento, para sa imbestigasyon asin tamang disposisyon.
Pagirumdom kan ahensya sa publiko na sunudon an mga nag-iiral na ley asin regulasyon orog na sa pagbiyahe nin mga regulated asin hazardous materials arog kan produktong petrolyo asin siertuhon na igwa ining pinanghahawakan na mga dokumento.
