LEGAZPI CITY- Gadan na kan madiskobre kan mga otoridad an bangkay ni Gaspar Doktor na nahiling na sanang nakabigti sa Barangay Nasandig, Batuan, Masbate.
Si Gaspar an suspek sa pangma-masaker sa tolong magkakaparientes sa Batuan kaiba na an 6 asin 7 anyos na biktima.
Segun sa Batuan Municipal Police Station, nakaresibe na sinda nin apod hali sa sarong concerned citizen manungod sa nadiskobreng bangkay nin lalaki na nakabigti sa sarong kubo sa nasabing barangay.
Tulos man ining nirespondehan kan PNP kung sain nakumpirmar na an pinaghahanap palan na suspek sa masaker an nadiskobreng bangkay.
Magigirumduman na nasa sarong okasyon an suspek kan baluon kaining tigbason si Rose Jane Riño na pigsahutan suboot an suspek na nanghabon sa wallet kan ina.
Pighunang natapos na an insidente makalihis namaghali na an suspek alagad pag-uli ni Riño sa saindang harong kan mahiling na pinagtitigbas na kan suspek an pinsan asin duwang menor de edad na pamangkin.
Enot naman na naglunsar ni manhunt operation kan PNP asin nagtao pa nin P50, 000 na reward money si Philippine Charity Sweepstakes Office (PCSO) Board Member Sandra Cam para sa marikas na pagkakadakop kan suspek.
Sa ngunyan, padagos pa an pinagsasagibong imbestigasyon kan mga otoridad sa panghuhugot kan suspek.
