Inaprobaran na kan Senado an Senate Bill 1982 o an emergency congressional authorization bill para ki Presidente Ferdinand Marcos Jr. na suspendiron an fuel excise tax.
Katuyuhan kaini na mabawasan an epekto kan nagpapadagos na iriwal sa Middle East.
Igwa ini nin botong 17 pabor, warang nagkontra, asin warang nag-abstain.
Puon kan pigsertipikahan ni Presidente Marcos an bill, dae na pig-implementar kan Senado an three-day rule asin tulos na pig-implementar.
Sa bersyon man kan House of Representatives kan House Bill 8418 na inaprobaran sa lower chamber kan Lunes, kaipuhan muna magdeklara an presidente nin state of national emergency o calamity nganing ma-justify an suspension o pagbawas kan excise tax sa mga produktong petrolyo.
Paliwanag man ni Senator Sherwin Gatchalian na an rason kun nyata siya nagbotong pabor iyo an huli ta kaipuhan kan mga namamanwaan an marikas na tabang huli sa padagos na paglangkaw kan presyo kan langis.
Mientrastanto, sinabi ni Senador Risa Hontiveros na an bill matao nin temporamentang kaginhawaan sa mga Pilipino, commuters, asin saradit na negosyante.
Mantang si Senador Pia Cayetano na iyo an chairman kan Senate committee on ways and means, nagpatanid ini na an pagsuspinde kan fuel excise tax an maresulta sa pagkalugi kan ganansya kan gobyerno na maabot sa P136 billion.
