LEGAZPI CITY – Pigheras kan sarong ina an saindang eksperyensya asin kulog nin boot sa sarong padi makalihis dae bunyagan an saindang aki huli suboot sa pag-ibi sana kaini sa laog nin simbahan.
Segun ki Lyca Solinap na residente kan Barangay Buyo, Manito, Albay sa intrevista kan Bombo Radyo Legazpi na mantang nagmimisa, nagtindog siya nganing paypayan kuta an saiyang aki alagad dinagitan siya kan padi asin kan magtukaw giraray siya, digdi na man uminibi na an saiyang aki huli sa labing init kan panahon.
Sinabihan giraray sinda kan padi sa microphone na papunduhon an pag-ibi kan saiyang aki huli sa ribok na pigkakawsa suboot kaini sa pigsasagibong misa.
Nagkawsa nin kasusupgan sa saindang pamilya an ginibo kan padi huli ta gabos na tawo sa simbahan an nakahiling sa sainda kun kaya dae na suboot natios kan saiyang esposo na simbagon ini.
Pag-istorya pa kaini na kan paluwas na sinda sa simbahan an nagdesisyon an padi na dae bunyagan an saindang aki sagkod sa kina-olay sinda kan secretary kaini asin ibinalik an saindang ibinayad para sa pagpapabunyag.
Sa ibong kan preparasyon, makamundo suboot huli ta dae na nabunyagan an saindang aki asin nasayang an ginastos ninda para sa nasabing okasyon.
Depensa niya man na nagsimbag sana siya asin an saiyang agom huli sa pagpapasupog na ginibo sa sainda kan nasabing padi makalihis na mag-ibi sana an saindang aki.
Sa presente asin bilang sarong ina, mawot niya na matawan nin aksyon an ginibo sainda kan naunambitang padi huli sa ipigkawsa kaining kasusupgan sa sainda asin nganing dae na ini mautro pa sa ibang mawot magpabunyag sa saindang lugar.
