LEGAZPI CITY—Irido an sarong indibidwal makalihis an nangyaring karambola kan mga behikulo sa Brgy. Cabagñan West, Legazpi City.
Segun ki Legazpi City Police Station Chief of Police PLTCOL Domingo Tapel Jr., sa intrevista kan Bombo Radyo Legazpi, imbuelto sa aksidente an duwang motor, sarong jeep, asin sarong Toyota Tamaraw.
Pighayag kan opisyal na nagkaproblema sa pagkontrol an drayber kan Toyota Tamaraw kun saen enot kaining nabangga an motor na kolor asul na pigmamaneho kan sarong estudyante na ikinairido kaini.
Alagad natamaan pa kan Toyota Tamaraw an sarong pampasadang jeep na nagsapo nin danyos an nagkapirang parte kaini alagad salbado man an gabos na lunad na pasahero.
Huring natamaan kan behikulo an sarong nakaparadang itom na motor na mantang warang nakasunad na indibidwal alagad iyo an pinakanapuruhan makalihis na nagsapo nin dakulang danyos sa insidente.
Basado sa imbestigasyon dae man pigsadya kan nasabing behikulo an insidente, asin segun sa opisyal na may kahaluyan na ini kun kaya pwedesir na nagkaigwa nin mechanical failure asin dae nakontrol kan driver an rikas kaini.
Sinabi man ni Tapel na pwedesir mahampang an driver kan Toyota Tamaraw sa kasong reckless imprudence resulting to physical injury asin reckless imprudence resulting to damage to property.
Mientrastanto, pighahalat pa kan saindang opisina an pag-oolay kan mga imbueltong indibidwal mapadapit sa desisyon sa pagsusunad nin kaso.
