Sinayumahan kan Sandiganbayan kan Huwebes, Peb. 5, ang kahagadan ni dating Senador Ramon “Bong” Revilla Jr. mailipat hale sa kulungan sa Quezon City pasiring sa Philippine National Police (PNP) Custodial Center sa Camp Crame.
Sa naging desisyon kan Third Division kan anti-graft court, ibinasura man an mosyon ni Revilla na i-quash ang impormasyon asin ibalik an kaso sa Office of the Ombudsman para sa reinvestigation.
Huli sa pagbasura kan saiyang petisyon, magtitinri na nakakarsel si Revilla sa New Quezon City Jail Male Dormitory, kun saen nakakulong man an saiyang mga kapwa akusado.
Susog pa sa korte, nagpalyar an dating senador na magpahiling nin bastanteng rason nganing tawan katwiran an saiyang kahagadan na ilipat kan kustodiya, partikularmente an saiyang mga alegasyon na nabubugtak sa peligro an saiyang buhay o siya an pigpupuntirya sa laog kan kulungan.
Magigiromdomang nagpuon an kaso sa reklamo kan tinanggal na Public Works engineer na si Henry Alcantara, na nag-akusar na nagresibe suboot si Revilla nin kickbacks hale sa sarong P92.8-million “ghost” flood control project sa Pandi, Bulacan.
Naenot nang nakulong si Revilla nin apat na taon makalihis madawit sa P10-billion pork barrel scam, kun saen siya kalaunan an napawarang-sala.
