LEGAZPI CITY – Karsel an bagsak kan pigkokonsiderang ranked No. 8 regional most wanted list kan rehiyon Bicol na may patung-patong na kaso nin rape makalihis na maarestar ini sa General Malvar Avenue, Santo Tomas, Batangas.
Segun ki Aroroy Muncipal Police Station Deputy Chief of Police Police Captain Antonio Padilla sa intrevista kan Bombo Radyo Legazpi na binisto an suspetsado na si alyas “Arman”, 37 anyos, residente kan Brgy. Puro, Aroroy, Masbate asin presenteng naka-istar sa Brgy. Benito, Lipa City, Batangas.
Nangyari an panlulugos kan 14 anyos pa sana an biktima asin kan maaraman suboot kan suspetsado na nagsunad na nin kaso laban saiya an pinorbaran na kaining magdulag asin magtago sa ley.
Aminado siya na nagin padifisilan sa saindang lado an pagdakop sa suspetsado alagad ginibo ninda an gabos nganing matunton an lokasyon kaini asin mapagbayadan an ginibo kaining krimen.
Pigtaram pa kan opisyal na na-iserbi an mandamiento de aresto sa suspetsado sa pakikipagtabangan kan Aroroy Municipal Police Station, Sto. Tomas City Police Station asin Batangas Police Provincial Office.
Nagpasalamat man siya sa magayon na pakikipagtabangan kan publiko asin sa pamilya kan biktima nganing maisunad an kaso sa suspetsado asin maguno an hustisya para sa biktima.
Sa presente an nagtetenir an suspetsado sa kustodiya kan Sto. Tomas City Police Station para sa magkakanigong disposisyon nakatalaang ibyahe pauli sa rehiyon bicol nganing hampangon an kasong isinangat laban saiya.
Pangapodan ni Padilla sa publiko na dae magduwa duwang magrani sa kapulisan kun may impormasyon an mga ini na makakatabang sa pagdakop sa mga indibidwal na pighahanap kan ley.
