LEGAZPI CITY—Arestado kan mga otoridad an sarong pinaghahanap na miyembro kan Communist Terrorist Group asin pigkonsiderar na Rank No. 10 most wanted person kan banwaan kan San Fernando, Masbate.
Segun ki San Fernando Municipal Police Station Acting Chief of Police, Police Captain Diaree Maribuhoc, sa intrevista kan Bombo Radyo Legazpi, binisto an suspek na si alias “Lito”, 63-anyos, sarong paraoma asin residente kan Barangay Altavista kan nasambitang banwaan.
Naarestar an suspek sa bisa kan mandamiento de aresto na iniluwas ni Hon. Arturo Clemente B. Revil, Presiding Judge kan Regional Trial Court Branch 50, San Jacinto, Masbate, na may petsang Hunyo 30, 2021 para sa kasong multiple attempted murder.
Sa presente nasa kustodiya na kan San Fernando MPS an suspek para sa magkakanigong disposisyon asin magkakanigong proseso.
Mensahe man kan opisyal sa publiko na padagos an saindang mga operasyon sa paghahanap kan mga wanted person nganing mamantenir an kaayusan sa provincia.
