LEGAZPI CITY- Dae pa tigbubuwag an Public Security Office (PSO) alagad riribayan man sana an gabos na empleyado kaini.
Ini an klinaro ni Legazpi City Mayor Noel Rosal katakod kan pagsuspinder sa operasyon kan PSO.
Sigon ki Rosal, dae na ninda ipigbale an nasambitan na opisina maski sa Palarong Bicol 2017.
Naobserbaran asin narisa nya kaya suboot na naglalangkaw an demand pag-abot sa seguridad kun kaya kaipuhan nang parahayon asin irehabilitate an serbisyo kan mga ini.
Dugang pa kan alkalde, ie-evaluate ninda an abilidad kan mga bagong Public Safety Officer siring man an paghigot sa mga rekisitos ngani na maibalik an kumpyansa kan publiko asin masierto an seguridad.
Sinabi pa kaini na dae na dapat pang pagpahaluyon an mga nanonotaran na problema asin kaipuhan nya nang maghiro ngunyan.
Mantang pighahalat na liwat na mabilog an opisina, 56 pulis an maribay sa mga ini para sa masunod na anom na bulan.
Pwedesir man suboot na mag-apply an mga dati nang empleyado alagad magigin pantay an pagtratar sa mga ini sa mga bagong aplikante.
Piglalaoman kan alkalde na 3 hasta sa 4 na bulan puon ngunyan, magkakaigwa na nin mga bagong security officers an syudad.
Kaipuhan nya suboot ining gibuhon ngani na dae na magdakula an mga reklamo asin problema.
