LEGAZPI CITY– Uminabot na sa P600 an presyo kan mga flower arrangements sa syudad nin Legazpi, sarong semana antes an Undas.
Ini an ipinagheras ni Vetty Llagas, sarong paratinda nin burak hale sa Daraga, Albay, na may 15 taon nang eksperyensya sa negosyo, segun sa intrevista kan Bombo Radyo Legazpi.
Segun ki Llagas, nagkakantidad ngonian nin P500 sagkod P600 an sarong full arrangement, mantang an mga indibidwal na burak nagkakantidad nin P100 hasta P150 kada saro.
Sinabi niya na mas hababa an mga presyo kaidto na nagpopoon sana sa P300 sagkod P400 kumpara sa ngonian nin huli ta naglangkaw na an presyo kan mga materyales, arog kan mga Malaysian mums asin anthuriums.
Dakul na mga parokyano an nagpapareserba na, alagad an mga paratinda nag-aako pa man giraray nin mga walk-in buyer.
Nag-abiso man an paratinda sa mga parabakal na magbakal nin atab tanganing maibitaran an kadakol na tawo asin posibleng dugang pang paglangkaw kan presyo sa mismong aldaw kan Undas.
