LEGAZPI CITY—Pigklaro kan Polangui Municipal Police Station na warang katotohanan an mga nagsirkular na bareta mapadapit sa pagkawara suboot nin sarong aki makalihis na pigdukot ini nin sarong van sa Barangay Maynaga asin iba pang lugar sa banwaan kan Polangui, Albay.
Segun ki Polangui MPS Deputy Chief of Police, Police Captain Renee Albao, sa intrevista kan Bombo Radyo Legazpi, na sa saindang pakikipag-olay sa mga barangay officials asin residentes napag-araman na saro ining fake news na naipaluwas sa social media.
Pig-asigurar man kan opisyal an publiko na sainda ining pigtatawan nin atensyon asin tulos na solusyon, en kaso man na nakakaresibi nin siring na mga isyu dapat tulos ining ipaaram sa mga otoridad.
Dugang ni Albao, na sa presente nagsasagibo sinda nin social media investigation sa mga nagpo-post nin siring na mga bako lehitimong bareta na ikinakahandal kan publiko.
Pigsierto man na sa oras maaraman kun sisay an nagpo-post kan nasambitang mga isyu pwedesir na masunadan nin kaso siring kan pagbalgar sa cybercrime law.
Afuera sa pirmeng pagpatrolya, nagsasagibo man an saindang opisina nin barangay visitation para matawan-linaw an mga siring na isyu na nagsisirkular sa social media.
Mientrastanto, pigtaram kan opisyal na preparado man an saindang hepatura na magtabang asin magresponde para malutas an naunambitang isyu.
