LEGAZPI CITY- Nanindogan an Philippine National Police (PNP) na dae matao kan pighahagad na P5 million-ransom money an gobierno kan Pilipinas katakod kan kinidnap na duwang pulis sa provincia kan Sulu.
Sa intrevista kan Bombo Radyo Legazpi ki PNP spokesperson PC/Supt. John Bulalacao, tinawang-duon kaini na dae babarion an ipigpapaotob na ‘No Ransom Policy’ kan gobierno.
Dugang pang dagos-dagos man an mga esfuersos na ipigsasagibo kontra sa criminal syndicates tangarig na ma-rescue an mga personahes.
Napag-araman na dinara kan mga inapod na “lawless elements” sinda PO2 Benierose Alvarez asin PO1 Dinah Gumahad kaibanan an duwang sibilyan na binistong sinda Jakosalem Ahamad Blas asin Faizal Ahidji sa banwaan kan Patikul.
Enot naman na ipighayag ni PNP chief Director General Oscar Albayalde na dae sinda madadara sa demand kan mga nasabing kidnapper mientras na kumpiyansang igwang “proof of life” sa mga nasabing kidnap victims.
