LEGAZPI CITY-Nagpoon na an manhunt operation kan Philippine National Police (PNP) sa bilog na nacion laban kay Sen. Ronald “Bato” dela Rosa kasunod kanwarrant of arrest na ipinaluwas kan International Criminal Court (ICC).
Segun PNP chief Gen. Jose Melencio Nartatez Jr., ipinakalat na an mga tracker teams makalihis na tugotan kan Department of Justice (DOJ) an pag-aresto sa Senador.
Sinabi pa ni Nartatez na pigsugo an mga pulis na ipaotob an maximum tolerance asin magsunod sa due process sa operasyon ngani na maprotehiran an direchos kan gabos na imbwelto.
Dugang pa kaini, kun madakop si Dela Rosa tulos na dadarahon sa kustodiya kan DOJ.
Mientrastanto, dae man pigbuyagyag kan DOJ kun dadarahon tulos si Dela Rosa sa The Hague, Netherlands, kun saen namumugtak an ICC detention facility.
Sa hiwalay na pahayag, kinumpirma kan Criminal Investigation and Detection Group (CIDG) na igwa sindang kopya kan ICC arrest warrant laban sa senador.
Nanindugan man an CIDG na yaon pa sa Pilipinas si Dela Rosa sa ibong kan mga report na nahiling suboot an Senador sa Malaysia.
Nagpatanid man an kapulisan na kun sisay an magtabang o mag-ulang sa pag-arestar, pwedisir na kasuhan nin obstruction of justice.
Apwera sa PNP, nagkondusir man nin separadong operasyon an National Bureau of Investigation (NBI) ngani na hanapon si Bato, asin sinabi ni NBI Director Melvin Matibag, na dadakupon tulos ninda an Senador kun masubaybayan ninda ini.
Mientrastanto, pinahimutikan man ni Sen. Robinhood Padilla an alegasyon na siya an nagtabang ki Dela Rosa na makadulag sa senado.
Segun ki Padilla, warang nagpugol sa sainda na magluwas sa edipisyo asin wara man nin ipinaheling na mandamiento hale sa lokal na korte.
Nanindugan man si Padilla na dae niya pigkokonsiderar na “fugitive” si Dela Rosa asin nagtutubod na dapat nangingibabaw an proseso kan ley sa Pilipinas.
Sa ibong na lado, sinabi man ni dating hepe kan PNP Nicholas Torre III na katungdan kan mga pulis na ipaotob an anuman na legal warrant asin dae dapat magin selective kun sisay an madadakop.
