LEGAZPI CITY—Nagtalaga na nin mga personahes an Philippine National Police – Bicol para maparikas an pag-ayos kan bulos nin trapiko sa may parte kan Lupi sa probinsya nin Camarines Sur.
Segun ki Police Brigadier General Andre Dizon, an regional director kan PNP Bicol, sa intrevista kan Bombo Radyo Legazpi, nagtalaga na sinda nin mga personahes sa Andaya Highway partikular na sa mga tinampo sa Lupi, Del Gallego, asin Ragay kan nasambit na probinsya.
An saindang opisina nakipagkoordinar naman sa Department of Public Works and Highways, Land Transportation Office asin Philippine Army para sa pagmanehar kan trapiko digdi.
Pigsierto man kan opisyal na an presensya kan mga nasambit na ahensya sa mga naunambitang mga tinampo iyo para magtao nin maayos asin normal na bulos nin trapiko.
Dugang pa kaini, na ipigpapadagos naman an reconstruction sa lugar na naapektaran kan mga nakaaging kalamidad, asin pig-asigurar na matatapos ini sa mas lalong madaling panahon.
Mientrastanto, naghagad man nin despensa an opisyal huli sa naeeksperyansyahang gabat na trapiko sa mga nasambitan na tinampo.
