Nangengenot an Land Transportation Office (LTO) asin Social Security System (SSS) sa listahan kan mga ahensya de gobierno na may pinakadakol na reklamo kan Marso.
Basado sa datos kan Anti-Red Tape Authority (ARTA), uminabot sa 152 an kabilugan na reklamo na saindang naresibe sa LTO, kun sain 132 an naresolbar asinn 20 an nagtetenir na aktibo.
An SSS man an nakapagrehistro nin 156 na reklamo, kun sain 112 an naresolarbar asin 44 an nakabinbin pa.
Segun ki ARTA Secretary Ernesto Perez, kadaklan sa mga reklamo an may kinaaraman sa pagka octaba kan serbisyo, dugang na requirements, asin pagbayolar sa Citizen’s Charter.
Pigduon ni Perez na padagos na nakikipag koordinar an ARTA sa mga ahensya ngani na mapakarahay an saindang serbisyo asin mabawasan an red tape.
Kaibanan man sa may mga halangkaw na reklamo an Bureau of Internal Revenue (BIR), Food and Drug Administration (FDA), Land Registration Authority (LRA), Philippine Statistics Authority (PSA), Department of Education (DepEd), siring man an National Telecommunications Commission (NTC), Department of Migrant Workers (DMW), Professional Regulation Commission (PRC), Department of Human Settlements and Urban Development (DHSUD), asin Department of Science and Technology (DOST).
Para man sa mga Government-Owned and Controlled Corporations (GOCCs), kaibanan sa may pinakadakol na reklamo an Pag-IBIG Fund, Philippine Health Insurance Corporation, Philippine Postal Corporation, Landbank of the Philippines, asin GSIS.
Siring man, sinabi kan ARTA na kadaklan sa mga reklamo an tulos man na pig-aaksyunan kun naipasa na sa magkakanigong ahensya.
