Kinondena kan Philippine Navy an isinagibong duwang aldaw na naval drills kan China sa Escoda Shoal sa West Philippine Sea.
Segun kay Commodore Roy Vincent Trinidad an tagapagtaram kan Philippine Navy para sa West Philippine Sea, nasa 125 na mga barko kan China kaiba na an 11 mga barkong panggera an namonitor sa Escoda Shoal puon kan nakalihis na semana.
Nagsagibo suboot ini nin mga drills, na sarong malinaw na pagsuway sa international law lalo pang laog pa ini sa exclusive economic zone kan Pilipinas.
Haros nasa 75 nautical miles sana an rayo kan Escoda shoal sa Palawan kung kaya malinaw na sakop pa ini kan teritoryo kan nasyun.
An escoda shoal an lugar kung sain nadiskubre kan Philippine Navy an pagtatambak nin mga gadan na korales kan China, na indikasyon na plano kaining magkriar na naman nin panibagong artipisyal na isla.
Sa ngunyan nakikipagkoordinar na an gobyerno kan Pilipinas sa Coast Guard kan Estados Unidos na nagpromesang masabay na sa pagpapatrolya sa West Philippine Sea ngani na mapugolan an mga agresibong lakdang kan China.
