LEGAZPI CITY-Pig-aadalan na ngonian kan Pasig City Police an pagsasangat nin reklamo asin kaso laban sa mga progresibong grupong nagsagibo nin hiro-protesta sa St. Gerrard Construction Compound na pagsadiri kan mga Discaya huli sa kawaran nin bastanteng permit.
Kasunod ini kan agresibong pag-gapo nin mga dugi asin pag-vandalize kan mga reliyista sa mga gate asin pader kan nasabing edipisyo.
Segun kay Pasig City Police Chief Police Colonel Hendrix Mangaldan, huli sa kawaran nin permit an nahihiling na sarong pagbayokar ini sa Batas Pambansa 880 o mas bisto bilang Public Assembly Act of 1985.
Mas pahihigoton pa suboot kan pulisya an saindang maximum tolerance bilang parte kan saindang mandato na respetuhon an direchos kan mga grupo dapit sa saindang mga agrangay sa laog kan demokratikong nacion.
Pigsisierto man ni Mangaldan na magpapaotob nin bastanteng deployment an Philippine National Police (PNP) bilang paghahanda sa mga posible pang protesta na isasagibo sa nasabing ciudad.
Nakahanda man suboot an linya ninda ngani na hampangon an mga siring na challenges asin pangyayari.
Mientrastanto, nagsasairarom pa sa deliberasyon asin pigsasaayos pa an mga dokumento para sa reklamong hahampangon kan mga raliyista.
