LEGAZPI CITY — Isasapinal ngonian na aldaw an gigibuhong lakdang sa kahagadan kan Department of Public Works and Highways (DPWH) na isarado an sarong tinampo sa banwaan kan Daraga, Albay.
Segun ki Public Safety Office (PSO) Daraga Head Reny Portillo, magkakaigwa nin pag-oolay an contrator kan DPWH, mga pulis, an lokal na gobierno asin Engineering Office kan banwaan tangarig diskutiron an magigin kasimbagan sa request kan DPWH.
Sinabi kan opisyal na nagsurat an ahensya sa oficina kan alkalde na naghahagad na ipasarado an T. Perez Street sa Mayo 1 tangarig na mabaguhan an nagbabaratak nang tinampo.
Imbes man suboot na i-half lane an closure, irerekomendar ni Portillo na dagos na ining isarado asin gibuhong two-way an Rigidor Street asin Rizal Street.
Naglalaom man an opisyal na matatapos an patrabaho sa katapusan kan Mayo kun kaya dapat dire-diretso an patrabaho antes man magpoon an kralasehan.
Segun pa ki Portillo, magkakaigwa nin re-routing oras na isagibo an lakdang kun kaya posibleng gumabat an bulos kan trapiko.
Abiso man kaini sa mga motorista na dae na magparada sa gilid kan tinampo tangarig makabawas sa gabat kan piot na agihan.
