LEGAZPI CITY- Tinuyaw kan sarong grupo nin transportasyon an pahayag kan Department of Energy na an pagsuspinde kan value added tax (VAT) an magreresulta sa dakulang pagkalugi sa ganansya kan gobierno.
Marurumduman na sinabi ni Energy Secretary Sharon Garin na an paghali kan VAT an posibleng magresulta sa P170 billion na pagkalugi sa gobierno.
Segun ki PISTON President Mody Floranda sa intrevista kan Bombo Radyo Legazpi na nagpapahiling sana ini na talagang warang plano an gobierno na tabangan an mga namamanwaan urog na ngunyan na panahon kan krisis.
Tinawan duon kan grupo na bako sana an langis an pinagukuwaan nin buwis kan gobierno.
Ipighalimbawa pa ni Floranda an nagkapirang mga darakulang negosyante na dae nagbabayad nin buwis.
Pinasaringan pa kaini an suboot pondo kan banwaan na napapasiring sana sa korapsyon.
