LEGAZPI CITY – Nagtutubod an sarong political science professor na dae na man kaipuhan na ipagsugo pa ni President Ferdinand Marcos Jr. an lifestyle checks sa mga opisyal kan gobierno katakod kan mga anomalya sa mga flood control projects.
Segun ki UST Manila Department of Political Science professor Paul Francisco sa intrevista kan Bombo Radyo Legazpi na dapat normal na sana ini sa gabos na empleyado kan gobierno huli ta kada taon an nagsusumiter sinda kan saindang mga Statement of Assets, Liabilities, and Net Worth (SALN) na kabale sa saindang mga transparency asin accountability.
Sa SALN man suboot mahihiling kun biglang nagyaman an sarong empleyado kan gobierno asin kun kaya nindang i-justify an saindang pagyaman huli ta nakasaad man sa konstitusyon asin Republic Act 6713 na nagsusugo na no-exemption sa pagsumite kaini.
Pwedesir man na natawan sana ini nin simpatya ngonian urog nang nagruluwasan an mga manlain-laing anomalya sa mga ipigpapatugdok na mga flood control projects asin ngonian sana nag-react an administrasyon kun nuarin kadakol na an naperwisyo kan mga korapsyon sa mga proyekto.
Pigtaram pa kan naunambitang professor na pwedesir na piggigibo ini kan Presidente nganing magin legasiya ini kan saiyang termino urog na kun dakol na darakulang persona an napakulong na imbwelto sa mga anomalya sa mga proyekto kan gobierno.
Huli suboot na pinunan kan Presidente an orolay manungod sa flood control project an dapat sanang tapuson asin dapat an may mapakulong na contractor nganing dae man ini maikonsidera bilang failure sa saiyang administrasyon.
Kun enkasong may mahiling an gobierno na may biglang nangyaman sa saindang mga empleyado siring man an pag-hiling liwat kan Commission on Election manungod sa Statement of Contributions and Expenditures (SOCE) kan apat na pulitiko na suboot nagresibi nin donasyon hale sa mga contractor an nagluluwas na nagpapabaya an gobierno asin Comelec sa pag-check asin pag-beripika kan mga pigsusumiteng mga dokumento.
Pagdoon pa ni Francisco na magseserbi man ngonian an media sa nasabing lifestyle check sa pagtatao nin publicity huli ta sa panahon ngonian an mapapalakop kan social media an impormasyon urog nang mismong Presidente na an nagsugo na nagpapahiling na labing importante an pagtutok sa mga siring kaining isyu na posible man makatabang sa pag-expose pa kan mga katiwalian asin biglang pagyaman kan mga pulitiko asin kan saindang pamilya.
