LEGAZPI CITY – Nagkaigwa nin pagrasay nin daga an parte kan Dapdap Macabalo Esplanade sa may parte kan Barangay Dap-dap sa ciudad kan Legazpi huli sa warang patod na pag-uuran na dara kan bagyong Ada.
Segun ki Punong Barangay Glenn Barcelon sa intrevista kan Bombo Radyo Legazpi na tulos sindang nagkoordinar sa City Disaster Risk Reduction and Management Office asin nagsagibo nin site inspection makalihis an insidente.
Pigka-olay na man suboot ninda asin inabisuhan an foreman kan sarong pigtutudok na harong harani sa pigrasayan kan daga para sa saindang pag-iingat enkaso mangyari ini liwat.
Nagbugtak na man an mga personahes kan Legazpi City Police Station nin signage sa hababang parte kan nagrasay na bulod nganing matawan patanid an namamanwaang nag-aagi harani sa lugar.
Ikinaugma man kan opisyal na warang harong o residente an nadanyaran kan mangyari an insidente mantang nalinigan na an mga debreeng nagkalat arug kan sanga kan mga kahoy.
Afuera sa pag-uuran an pighihiling niya man na rason sa insidente iyo an mga itinambak na mga daga sa nagrasay na hampas hale sa mga pigsasagibong dredging sa Macabalo rive.
Pagdoon man ni Barcelon na dae man sinda nagkukulang sa pagpatanid sa saiyang mga nasasakupan katakod sa mga siring kaining pangyayari urog na ngonian na panahon nin tag-uran.
